బీహార్ బస్సు ప్రమాదం బాధాకరం: వైయస్ జగన్

బీహార్ రాష్ట్రంలోని ఔరంగాబాద్ సమీపంలో నెల్లూరు జిల్లా నుంచి కాశీయాత్రకు వెళ్తున్న యాత్రికుల బస్సు ప్రమాదానికి గురై ముగ్గురు భక్తులు మృతిచెందిన ఘటనపై మాజీ ముఖ్యమంత్రి, వైఎస్సార్సీపీ అధ్యక్షుడు వైయస్ జగన్ తీవ్ర దిగ్భ్రాంతి వ్యక్తం చేశారు. ఎదురుగా వస్తున్న లారీ బస్సును ఢీకొనడంతో ఈ ప్రమాదం చోటుచేసుకోవడం అత్యంత విషాదకరమని ఆయన పేర్కొన్నారు. మృతుల్లో సంగం మండలానికి చెందిన ఇద్దరు, ఆత్మకూరుకు చెందిన ఒక మహిళ ఉండటం మరింత బాధాకరమన్నారు.

మృతుల కుటుంబాలకు వైయస్ జగన్ తన ప్రగాఢ సానుభూతిని తెలియజేస్తూ, ఈ తీరని విషాదాన్ని తట్టుకునే ధైర్యాన్ని దేవుడు ప్రసాదించాలని ప్రార్థించారు. ప్రమాదంలో గాయపడిన 15 మంది యాత్రికులు త్వరగా కోలుకోవాలని ఆకాంక్షించారు. బాధితులకు మెరుగైన వైద్యసేవలు అందించేందుకు అధికారులు చర్యలు తీసుకోవాలని కోరిన ఆయన, బాధిత కుటుంబాలకు అవసరమైన అన్ని విధాల సహాయ సహకారాలు అందించాలని ప్రభుత్వాన్ని విజ్ఞప్తి చేశారు.