డీజే సౌండ్స్‌పై పోలీసులకు అల్లు శిరీష్‌ ఫిర్యాదు

తెలుగు రాష్ట్రాల్లో గత రెండు వారాలుగా వినాయక చవితి వేడుకలు సందడిగా సాగాయి. అయితే వేడుకల సమయంలో ఏర్పడుతున్న శబ్ద కాలుష్యంపై కొందరు అసంతృప్తి వ్యక్తం చేస్తున్నారు. ఇటీవల పవన్ కల్యాణ్ మాజీ భార్య రేణు దేశాయ్ కూడా రాత్రిపూట నిమజ్జనాలు నిర్వహించడంపై స్పందిస్తూ, సాయంత్రం 6–7 గంటల్లోపే నిమజ్జనం పూర్తి చేసుకోవచ్చని సూచించారు. తాజాగా అల్లు అర్జున్ సోదరుడు, నటుడు అల్లు శిరీష్ కూడా వినాయక చవితి వేడుకల సందర్భంగా శబ్ద కాలుష్యంతో ఇబ్బందులు ఎదుర్కొంటున్నట్లు తెలిపారు. ఈ మేరకు హైదరాబాద్ పోలీసులకు ఫిర్యాదు చేశారు.

శేఖ్‌పేట్‌లోని అపర్ణా వన్ అపార్ట్‌మెంట్‌లో తాను నివసిస్తున్నట్లు పేర్కొన్న అల్లు శిరీష్.. వినోభానగర్‌లోని హనుమాన్ ఆలయం వద్ద అర్ధరాత్రి వరకు పెద్ద శబ్దాలతో సంగీతం వినిపిస్తుండటంతో స్థానికులు ఇబ్బందులు పడుతున్నారని తెలిపారు. రాత్రి 2–3 గంటల వరకు శబ్దాలు కొనసాగుతున్నాయని, గతంలోనే ఫిల్మ్‌నగర్ పోలీస్ స్టేషన్‌లో ఫిర్యాదు చేసినట్లు వెల్లడించారు. గణేశ్ నిమజ్జనం నేపథ్యంలో సెప్టెంబర్ 25 వరకు సహకరించాలని పోలీసులు సూచించినప్పటికీ, నిమజ్జనం పూర్తైన తర్వాత కూడా శబ్ద కాలుష్యం కొనసాగుతోందని తెలిపారు. వృద్ధులు, చిన్నారులు, ఉద్యోగులు తీవ్ర అసౌకర్యానికి గురవుతున్నారని పేర్కొంటూ, రాత్రివేళల్లో శబ్ద కాలుష్య నిబంధనలు ఉల్లంఘించకుండా తగిన చర్యలు తీసుకోవాలని హైదరాబాద్ సిటీ పోలీసులను కోరారు. నటుడిగా అల్లు శిరీష్ ‘గౌరవం’ సినిమాతో పరిచయమయ్యారు. ‘శ్రీరస్తు శుభమస్తు’ సహా పలు చిత్రాల్లో నటించిన ఆయన చివరిగా ‘బడ్డీ’లో కనిపించారు. ఈ ఏడాది మార్చిలో నయనిక రెడ్డిని వివాహం చేసుకున్నారు.