హీరోగా విజయ్ తనయుడు జేసన్ సంజయ్ ఎంట్రీ? గ్రాండ్ లాంచ్‌కు లైకా ప్లాన్!

తమిళ సినీ పరిశ్రమలో స్టార్ హీరో దళపతి విజయ్ తనయుడు జేసన్ సంజయ్ త్వరలో హీరోగా వెండితెరకు పరిచయం కానున్నట్లు ప్రచారం జరుగుతోంది. టాలీవుడ్ నటుడు సందీప్ కిషన్ హీరోగా, లైకా ప్రొడక్షన్స్ నిర్మాణంలో జేసన్ దర్శకుడిగా పరిచయమైన సినిమా ఇటీవల విడుదలై మిశ్రమ స్పందనను అందుకుంది. కథ, కథనాల్లో కొత్తదనం లేదని కొన్ని సమీక్షలు పేర్కొన్నాయి. మరోవైపు, జేసన్‌ను హీరోగా చూడాలని విజయ్ అభిమానులు ఆసక్తిగా ఎదురుచూస్తుండటంతో ఆయన నటనా ప్రవేశంపై చర్చ మొదలైంది.

కోలీవుడ్ వర్గాల సమాచారం ప్రకారం, జేసన్‌ను హీరోగా పరిచయం చేసేందుకు లైకా ప్రొడక్షన్స్ భారీ ప్రణాళికలు సిద్ధం చేస్తోంది. ఈ ప్రాజెక్ట్ కోసం పలువురు దర్శకులు కథలు వినిపించినట్లు తెలుస్తోంది. మాస్, యాక్షన్ చిత్రాలకు పేరుగాంచిన దర్శకుడు లింగుసామి పేరు కూడా ప్రచారంలో ఉంది. అయితే, కథ, కథనాలపై ఇంకా చర్చలు జరుగుతున్నట్లు సమాచారం. నటుడు విక్రాంత్ సోదరుడు సంజీవ్ కూడా ఈ ప్రాజెక్ట్ రూపకల్పనలో భాగమవుతున్నారని, జేసన్‌కు సంబంధించిన వ్యవహారాలను పర్యవేక్షిస్తున్నారని కథనాలు పేర్కొంటున్నాయి. ఆయన గతంలో సిగ్మా చిత్రానికి ఎగ్జిక్యూటివ్ ప్రొడ్యూసర్‌గా పనిచేశారు. దర్శకుడు, నటీనటులు, చిత్రీకరణ వివరాలపై అధికారిక ప్రకటన రావాల్సి ఉంది.