‘ఐమ్‌ గేమ్‌’ మూవీ రివ్యూ.. దుల్కర్‌ సల్మాన్‌ అదరగొట్టాడు

దుల్కర్‌ సల్మాన్‌ కథానాయకుడిగా నహాస్‌ హిదయత్‌ దర్శకత్వంలో తెరకెక్కిన ‘ఐమ్‌ గేమ్‌’ సెప్టెంబర్‌ 3న ప్రేక్షకుల ముందుకొచ్చింది. డ్యాన్‌ జాన్‌ (దుల్కర్‌ సల్మాన్‌) జూదానికి బానిసైన యువకుడు. బెట్టింగ్‌లో భారీగా డబ్బు కోల్పోయిన అతడు, ఓ ప్రమాదంలో కుడి చేయిని కోల్పోతాడు. వైద్యులు మరో వ్యక్తి చేయిని అతడికి అమర్చిన తర్వాత పరిస్థితులు అనూహ్యంగా మారతాయి. ఆ చేయి డ్యాన్‌ నియంత్రణలో ఉండకుండా సొంతంగా కదులుతూ, అతడు ఊహించని పనులు చేస్తుంటుంది. ఓ బెట్టింగ్‌ సెంటర్‌లో డేవిడ్‌ (మిస్కిన్‌)ను చూసిన వెంటనే ఆ చేయి అతడిపై దాడికి ప్రయత్నించడంతో అసలు కథ మొదలవుతుంది. ఇంతకీ ఆ చేయి ఎవరిది? దానికి అంత శక్తి ఎలా వచ్చింది? డేవిడ్‌ను ఎందుకు లక్ష్యంగా చేసుకుంది? అనేదే సినిమా ప్రధాన కథాంశం.

కొత్త కాన్సెప్ట్‌తో దర్శకుడు నహాస్‌ హిదయత్‌ ఆసక్తికరమైన ప్రపంచాన్ని సృష్టించాడు. డ్యాన్‌ జూదానికి బానిసైన విధానాన్ని పరిచయం చేసే ప్రారంభ భాగం కాస్త నెమ్మదిగా సాగినా, కుడి చేయి అతడి నియంత్రణలో లేదనే అంశం బయటపడిన తర్వాత సినిమా వేగం పుంజుకుంటుంది. డ్యాన్‌, అతడి కుడి చేయి మధ్య జరిగే సంఘర్షణ, యాక్షన్‌, హాస్య సన్నివేశాలు ఆకట్టుకుంటాయి. ముఖ్యంగా విరామానికి ముందు వచ్చే సన్నివేశాలు ఉత్కంఠను పెంచుతాయి. అయితే ద్వితీయార్ధంలో విక్కీ (ఆంటోనీ వర్గీస్‌) ఫ్లాష్‌బ్యాక్‌ రొటీన్‌గా అనిపించడం, క్రికెట్‌ నేపథ్యంలోని సన్నివేశాలు పెద్దగా కొత్తదనం లేకపోవడం, భావోద్వేగాలు పూర్తిగా పండకపోవడం సినిమాకు ప్రతికూలంగా మారాయి. పతాక సన్నివేశాలు మాత్రం మళ్లీ ఆసక్తిని పెంచుతాయి.

దుల్కర్‌ సల్మాన్‌ డ్యాన్‌ పాత్రలో ఆకట్టుకున్నాడు. ముఖ్యంగా తన కుడి చేయితోనే తాను పోరాడే సన్నివేశాల్లో ఆయన నటన సినిమాకు ప్రధాన బలంగా నిలుస్తుంది. ఆంటోనీ వర్గీస్‌ తన పరిధిలో మెప్పించగా, మిస్కిన్‌ పాత్రలో పెద్దగా కొత్తదనం కనిపించదు. కయాదు లోహర్‌, సంయుక్త విశ్వనాథన్‌ తమ పాత్రలకు న్యాయం చేశారు. జేక్స్‌ బిజోయ్‌ సంగీతం పలు సన్నివేశాలను మరింత ప్రభావవంతంగా మార్చింది. జిమ్షీ ఖలీద్‌ సినిమాటోగ్రఫీ బాగుంది. అయితే నిడివి, ముఖ్యంగా ద్వితీయార్ధంలోని కొన్ని సన్నివేశాలకు కత్తెర వేసి ఉంటే సినిమా మరింత షార్ప్‌గా ఉండేది.

బలాలు: దుల్కర్‌ సల్మాన్‌ నటన, ప్రథమార్ధం, విరామ సన్నివేశాలు
బలహీనతలు: నిడివి, ద్వితీయార్ధంలోని సాగదీత సన్నివేశాలు

చివరిగా: ‘ఐమ్‌ గేమ్‌’లో ఫస్ట్‌ ఇన్నింగ్స్‌ అదిరిపోయింది.. సెకండ్‌ ఇన్నింగ్స్‌ మాత్రం కొంత తేలిపోయింది.