ఆసియా ఛాంపియన్స్‌ ట్రోఫీ ఫైనల్‌కు దూసుకెళ్లిన టీమ్‌ఇండియా

ఆసియా ఛాంపియన్స్‌ ట్రోఫీ హాకీలో భారత జట్టు తన అద్భుత ఫామ్‌ను కొనసాగిస్తోంది. బుధవారం జరిగిన సెమీఫైనల్లో దక్షిణ కొరియాను 8-1తో చిత్తు చేసి ఫైనల్‌కు దూసుకెళ్లింది. భారత ఆటగాళ్లు శివానంద్‌ లక్రా (4వ, 13వ నిమిషాలు), దిల్‌ప్రీత్‌ (21వ, 25వ నిమిషాలు) చెరో రెండు గోల్స్‌ సాధించారు. కెప్టెన్‌ హర్మన్‌ప్రీత్‌ సింగ్‌ (9వ), సుఖ్‌జీత్‌ సింగ్‌ (21వ), అంగద్‌బీర్‌ సింగ్‌ (36వ), వివేక్‌ సాగర్‌ ప్రసాద్‌ (54వ) తలో గోల్‌ కొట్టి జట్టు భారీ విజయానికి తోడ్పడ్డారు. తొలి అర్ధభాగం ముగిసేసరికే భారత్‌ 6-1తో ఆధిక్యంలో నిలిచింది. ఈ మ్యాచ్‌లో భారత్‌కు నాలుగు పెనాల్టీ కార్నర్లు లభించగా.. దక్షిణ కొరియాకు ఒక్కటి కూడా దక్కలేదు. కొరియా తరఫున సంగ్‌జున్‌ హాన్‌ (9వ నిమిషం) ఏకైక గోల్‌ సాధించాడు.

ఆసియా ఛాంపియన్స్‌ ట్రోఫీ ఫైనల్‌కు భారత్‌ చేరడం ఇది ఏడోసారి. రౌండ్‌ రాబిన్‌ దశలోనూ దక్షిణ కొరియాను 8-0తో ఓడించిన భారత జట్టు.. ఈ టోర్నీలో ఇప్పటివరకు ఒక్క మ్యాచ్‌లోనూ ఓటమి చవిచూడలేదు. గురువారం జరిగే ఫైనల్లో జపాన్‌తో అమీతుమీ తేల్చుకోనుంది. మరో సెమీఫైనల్లో జపాన్‌ పెనాల్టీ షూటౌట్‌లో 5-3తో మలేసియాను ఓడించి తుది పోరుకు అర్హత సాధించింది. దీంతో టైటిల్‌ కోసం భారత్‌, జపాన్‌ జట్లు తలపడనున్నాయి.