వదోదర, ముంబయి వేదికలుగా మహిళల ప్రీమియర్‌ లీగ్‌

మహిళల ప్రీమియర్‌ లీగ్‌ (డబ్ల్యూపీఎల్‌) ఐదో సీజన్‌కు రంగం సిద్ధమైంది. 2027 సీజన్‌ జనవరి 14 నుంచి ఫిబ్రవరి 7 వరకు జరగనుంది. ఈ మేరకు భారత క్రికెట్‌ నియంత్రణ మండలి (బీసీసీఐ) బుధవారం టోర్నీ పూర్తి షెడ్యూల్‌ను ప్రకటించింది. వదోదర, ముంబయి నగరాలు ఈ మెగా టోర్నీకి ఆతిథ్యమివ్వనున్నాయి. ఒక్కో నగరంలో 11 మ్యాచ్‌లు నిర్వహించనున్నారు. జనవరి 14న జరిగే తొలి మ్యాచ్‌లో డిఫెండింగ్‌ ఛాంపియన్‌ రాయల్‌ ఛాలెంజర్స్‌ బెంగళూరు (ఆర్సీబీ), ముంబయి ఇండియన్స్‌తో తలపడనుంది.

వదోదరలో తొలి దశ మ్యాచ్‌లు ముగిసిన తర్వాత టోర్నీ ముంబయికి మారనుంది. అక్కడి బ్రబౌర్న్‌ స్టేడియం మిగిలిన లీగ్‌ మ్యాచ్‌లతో పాటు ప్లేఆఫ్స్‌కు ఆతిథ్యమివ్వనుంది. ఫిబ్రవరి 5న ఎలిమినేటర్‌ మ్యాచ్‌ జరగనుండగా.. ఫిబ్రవరి 7న ఫైనల్‌ నిర్వహించనున్నారు. టోర్నీలోని అన్ని మ్యాచ్‌లు రాత్రి 7.30 గంటలకు ప్రారంభం కానున్నాయి. ఐదు జట్లు టైటిల్‌ కోసం పోటీపడనున్న ఈ సీజన్‌పై ఇప్పటికే అభిమానుల్లో ఆసక్తి నెలకొంది.