మైక్రోసాఫ్ట్ గేమింగ్ విభాగంలో ‘రిసెట్’ ప్రక్రియ ప్రారంభం

మైక్రోసాఫ్ట్‌కు చెందిన ఎక్స్‌బాక్స్ గేమింగ్ విభాగం భారీ పునర్వ్యవస్థీకరణ దిశగా అడుగులు వేస్తున్నట్లు అంతర్జాతీయ మీడియా కథనాలు వెల్లడిస్తున్నాయి. ఈ ప్రక్రియలో భాగంగా హెల్‌బ్లేడ్ సిరీస్‌తో ప్రపంచవ్యాప్తంగా గుర్తింపు పొందిన యూకేకు చెందిన నింజా థియరీ స్టూడియోను మూసివేసే అవకాశం ఉన్నట్లు సమాచారం. ఈ విషయాన్ని సంస్థ ఉద్యోగులకు అంతర్గత సమావేశంలో తెలియజేసినట్లు వార్తలు వెలువడ్డాయి. అయితే స్టూడియోను కొనుగోలు చేసి కొనసాగించే పెట్టుబడిదారు ముందుకు రావచ్చనే ఆశాభావం ఉద్యోగుల్లో కనిపిస్తోంది.

నింజా థియరీతో పాటు కంపల్షన్ గేమ్స్, డబుల్ ఫైన్ వంటి ఎక్స్‌బాక్స్ అనుబంధ స్టూడియోలు కూడా స్వతంత్ర సంస్థలుగా మారే అవకాశాలపై చర్చలు జరుపుతున్నట్లు తెలుస్తోంది. పెరుగుతున్న అభివృద్ధి వ్యయాలు, హార్డ్‌వేర్ ఖర్చులు, గేమింగ్ మార్కెట్‌లో మారుతున్న పరిస్థితుల నేపథ్యంలో ఎక్స్‌బాక్స్ వ్యూహాన్ని మైక్రోసాఫ్ట్ పునఃసమీక్షిస్తోంది. ఈ పరిణామాలు సంస్థ గేమింగ్ విభాగంలో భవిష్యత్తులో మరిన్ని కీలక మార్పులకు దారితీయవచ్చని విశ్లేషకులు అభిప్రాయపడుతున్నారు.