ఇక రోబోల తయారీకి మనుషులు అక్కర్లేదా?

చైనాకు చెందిన ఎలక్ట్రిక్‌ వాహనాల తయారీ సంస్థ ఎక్స్‌పెంగ్‌ రోబోట్ల తయారీలో సరికొత్త అడుగు వేసింది. ప్రపంచంలోనే తొలిసారిగా రోబోలతోనే రోబోలను తయారు చేసే ఉత్పత్తి కేంద్రాన్ని గ్వాంగ్‌జౌలో ఏర్పాటు చేసినట్లు సంస్థ వెల్లడించింది. ఈ కేంద్రంలో రోబోల తయారీ ప్రక్రియలో 80 శాతానికిపైగా పనులు స్వయంచాలిత వ్యవస్థల ద్వారా పూర్తవుతాయని తెలిపింది. ఇక్కడ తయారైన తొలి ‘ఐరన్‌’ రోబో అసెంబ్లింగ్‌ పూర్తిచేసుకుని స్వయంగా ఉత్పత్తి శ్రేణి నుంచి బయటకు వచ్చిన వీడియోను సంస్థ విడుదల చేయగా, అది విస్తృతంగా ఆకట్టుకుంటోంది.

ఈ ఉత్పత్తి కేంద్రంలో మనుషులతోపాటు యంత్రాలు, స్వయంచాలిత వ్యవస్థలు కలిసి పనిచేస్తున్నప్పటికీ, మొత్తం తయారీ ప్రక్రియలో 80 శాతానికి పైగా పనులను ఆటోమేషన్‌ వ్యవస్థలే నిర్వహిస్తాయని ఎక్స్‌పెంగ్‌ తెలిపింది. ఎలక్ట్రిక్‌ వాహనాల తయారీలో సంపాదించిన అనుభవాన్ని రోబోల ఉత్పత్తిలో వినియోగిస్తున్నట్లు పేర్కొంది. ఈ ఏడాది చివరి నాటికి ‘ఐరన్‌’ రోబోల ఉత్పత్తిని భారీగా పెంచాలని, 2027లో చైనాతోపాటు అంతర్జాతీయ మార్కెట్లకు వీటిని విస్తృతంగా సరఫరా చేయాలని లక్ష్యంగా పెట్టుకున్నట్లు సంస్థ వెల్లడించింది.