పానీపూరీలతో 13 అడుగుల గణపతి..

మహారాష్ట్రలోని పుణెలో వినూత్న గణపతి విగ్రహం అందరినీ ఆకట్టుకుంటోంది. ఫెర్గూసన్‌ కాలేజీ రోడ్డులో ఏకంగా 21 వేల పానీపూరీలతో 13 అడుగుల గణపతి విగ్రహాన్ని ఏర్పాటు చేశారు. వెదురు, కాగితంతో రూపొందించిన చట్రంపై ఒక్కో పానీపూరీని జాగ్రత్తగా అమర్చి ఈ భారీ విగ్రహాన్ని రూపొందించారు. పూజా కార్యక్రమాల కోసం పక్కనే మరో చిన్న గణపతి విగ్రహాన్ని కూడా ఏర్పాటు చేశారు.

స్థానికంగా గణేష్‌ భేల్‌ దుకాణం నిర్వహించే రూపేష్‌, దినేష్‌ ఈ వినూత్న ఆలోచనకు రూపకల్పన చేశారు. సంప్రదాయ గణేశ్‌ చతుర్థి వేడుకలకు భిన్నంగా, పానీపూరీలతో గణపతి విగ్రహాన్ని రూపొందించడం స్థానికులు, సందర్శకులను విశేషంగా ఆకట్టుకుంటోంది. ప్రముఖ స్ట్రీట్‌ ఫుడ్‌ను పండుగ కళతో మేళవించిన ఈ ప్రత్యేక విగ్రహం ప్రస్తుతం పుణెలో చర్చనీయాంశంగా మారింది.