ఏపీ మ‌న‌మిత్ర వాట్సాప్ గ‌వ‌ర్నెన్స్ ద్వారా కుల ధృవీక‌ర‌ణ ప‌త్రాల జారీ...

ఆంధ్రప్రదేశ్ ప్రభుత్వం పౌరులకు ప్రభుత్వ సేవలను మరింత సులభంగా అందించేందుకు మనమిత్ర వాట్సాప్ గవర్నెన్స్ ద్వారా కుల ధృవీకరణ పత్రాలను పొందే సదుపాయాన్ని అందుబాటులోకి తీసుకొచ్చింది. ఈ సేవ ద్వారా పౌరులు ప్రభుత్వ కార్యాలయాలకు వెళ్లకుండానే తమ మొబైల్ ఫోన్‌లోనే కుల ధృవీకరణ పత్రాన్ని డౌన్‌లోడ్ చేసుకోవచ్చు. ఇందుకోసం ముందుగా 9552300009 మనమిత్ర వాట్సాప్ గవర్నెన్స్ నంబర్‌కు “Hi” అని సందేశం పంపాలి. అనంతరం Servicesను ఎంపిక చేసి, అందులో Revenue Services ఆప్షన్‌ను ఎంచుకోవాలి. ఆ తర్వాత “Re-Issuance of Integrated Certificate” ఆప్షన్‌ను ఎంపిక చేయాలి.

తదుపరి ఆధార్ నంబర్‌ను నమోదు చేస్తే ధృవీకరణ కోసం OTP వస్తుంది. OTPను నమోదు చేసిన తర్వాత అడిగిన వివరాలను పొందుపరిచి, రూ.40 రుసుము చెల్లిస్తే కుల ధృవీకరణ పత్రం మొబైల్ ఫోన్‌లోనే డౌన్‌లోడ్ చేసుకోవచ్చు. పౌరులు తాము ఉన్న ప్రదేశం నుంచే ఎప్పుడైనా ఈ సదుపాయాన్ని వినియోగించుకునే అవకాశం ఉందని RTGS అధికారులు తెలిపారు. ప్రజలు ఈ డిజిటల్ సేవను సద్వినియోగం చేసుకోవాలని అధికారులు కోరారు.