తెలంగాణలో భారీగా తగ్గిన బొగ్గు నిల్వలు

తెలంగాణలో బొగ్గు నిల్వలు గణనీయంగా తగ్గిపోయినట్లు కేంద్ర విద్యుత్ మండలి (సీఈసీ) తన నివేదికలో వెల్లడించింది. రాష్ట్రంలోని విద్యుత్ కేంద్రాలకు అవసరమైన బొగ్గులో కేవలం 24 శాతం మాత్రమే అందుబాటులో ఉందని పేర్కొంది. యాదాద్రి థర్మల్ పవర్ ప్లాంట్‌లో కూడా అవసరమైన స్థాయిలో బొగ్గు సరఫరా లేక ఉత్పత్తి తగ్గిపోయిందని నివేదిక తెలిపింది. సింగరేణి ఉత్పత్తి గత ఐదేళ్లలో కనిష్ఠ స్థాయికి చేరినట్లు పేర్కొంది.

దేశంలోనే అత్యల్ప బొగ్గు నిల్వలు తెలంగాణలోనే ఉన్నాయని సీఈసీ స్పష్టం చేసింది. యాదాద్రి ప్లాంట్‌కు రోజువారీ అవసరానికి తగిన బొగ్గు అందక ఉత్పత్తి తీవ్రంగా ప్రభావితమైందని తెలిపింది. నిల్వలు కనిష్ఠ స్థాయికి పడిపోవడంతో బొగ్గు సరఫరా పెంచాలని సీఈసీ సింగరేణికి ఆదేశాలు జారీ చేసింది. ఇదే సమయంలో ఉత్పత్తి వివరాలను వెబ్‌సైట్‌లో చూపడం నిలిపివేయడం కూడా చర్చనీయాంశమైంది.