రష్యా యురేనియంపై అమెరికాకు మినహాయింపు ఎందుకు?

రష్యా నుంచి చమురు, సహజ వాయువు కొనుగోలు చేసే దేశాలపై ఆర్థిక ఒత్తిడిని పెంచేందుకు అమెరికా ముందుకు సాగుతోంది. ‘లిండ్సే ఓ. గ్రాహమ్ శాంక్షనింగ్ రష్యా అండ్ ఇరాన్ యాక్ట్-2026’ను అమెరికా కాంగ్రెస్ ఉభయసభలు ఆమోదించాయి. ఈ చట్టం అమల్లోకి వస్తే రష్యా నుంచి భారీగా చమురు, సహజ వాయువు కొనుగోలు చేసే దేశాలపై గరిష్ఠంగా 100 శాతం వరకు సుంకాలు విధించే అధికారం అధ్యక్షుడు డొనాల్డ్ ట్రంప్‌కు లభిస్తుంది. అయితే పౌర అణు సహకారం, యురేనియం సరఫరాలకు సంబంధించిన కొన్ని మినహాయింపులు ఇందులో ఉన్నాయి. ప్రస్తుతం ఈ బిల్లు ట్రంప్ ఆమోదం కోసం వెళ్లింది.

అమెరికా అణు ఇంధన రంగం విదేశీ సరఫరాలపై గణనీయంగా ఆధారపడుతోంది. అమెరికా ఎనర్జీ ఇన్ఫర్మేషన్ అడ్మినిస్ట్రేషన్ ప్రకారం.. 2025లో అమెరికా పౌర అణు విద్యుత్ సంస్థలు కొనుగోలు చేసిన ఎన్‌రిచ్‌మెంట్ సేవల్లో రష్యా వాటా 26 శాతంగా ఉంది. దేశీయ యురేనియం ఎన్‌రిచ్‌మెంట్ సామర్థ్యాన్ని పెంచేందుకు అమెరికా ప్రభుత్వం బిలియన్ల డాలర్ల పెట్టుబడులు పెడుతోంది. 2025లో అమెరికా విద్యుత్ ఉత్పత్తిలో అణు విద్యుత్ వాటా సుమారు 18 శాతంగా ఉంది. దీంతో దేశీయ సామర్థ్యం పూర్తిస్థాయిలో అందుబాటులోకి వచ్చే వరకు సరఫరా కొనసాగింపుపై అమెరికా దృష్టి పెట్టినట్లు తెలుస్తోంది.