అజిత్ కుమార్ ‘డేర్‌డెవిల్’ కాస్టింగ్‌పై ఆసక్తికరమైన అప్‌డేట్

అజిత్ కుమార్ హీరోగా, అధిక్ రవిచంద్రన్ దర్శకత్వంలో తెరకెక్కుతున్న ‘డేర్‌డెవిల్’ చిత్రానికి సంబంధించి కాస్టింగ్‌పై ఆసక్తికరమైన వార్తలు వినిపిస్తున్నాయి. ఈ సినిమాలో కీలక పాత్ర కోసం మోహన్‌లాల్ పేరు గతంలో వినిపించగా.. తాజా నివేదికల ప్రకారం ఆయన ఈ ప్రాజెక్ట్‌లో భాగం కావడం లేదని తెలుస్తోంది. పారితోషికానికి సంబంధించిన అంశాలే ఇందుకు కారణమని కొన్ని కథనాలు పేర్కొంటున్నాయి. మరోవైపు శ్రీలీల కూడా డేట్స్ సమస్యల కారణంగా సినిమా నుంచి తప్పుకున్నట్లు ప్రచారం జరుగుతోంది.

మోహన్‌లాల్ చేయాల్సిన పాత్ర కోసం కన్నడ స్టార్ హీరో సుదీప్‌తో చిత్రబృందం చర్చలు జరుపుతున్నట్లు ప్రస్తుతం కోలీవుడ్ వర్గాల్లో టాక్ వినిపిస్తోంది. అయితే ఈ విషయంపై అధికారిక ప్రకటన రావాల్సి ఉంది. ఇదిలా ఉంటే, ‘డేర్‌డెవిల్’ షూటింగ్ నవంబర్ 2 నుంచి ప్రారంభం కానున్నట్లు చిత్రబృందం ఇప్పటికే ప్రకటించింది.