నాగబంధం వెనుక దాగిన మిస్టరీ ఏంటి?

అభిషేక్ నామా దర్శకత్వంలో రూపొందిన పాన్ ఇండియా పౌరాణిక అడ్వెంచర్ థ్రిల్లర్ ‘నాగబంధం’ జులై 3న విడుదల కానున్న నేపథ్యంలో చిత్రబృందం చెన్నైలో మీడియా సమావేశం నిర్వహించింది. నిర్మాత కలైపులి ఎస్. థాణు మాట్లాడుతూ నాగుపాముల నేపథ్యంలోని చిత్రాలకు ప్రేక్షకుల్లో ఎప్పుడూ ప్రత్యేక ఆదరణ ఉంటుందని, ‘నాగబంధం’ కూడా ఘన విజయాన్ని సాధిస్తుందనే నమ్మకం వ్యక్తం చేశారు. నిర్మాత ఎ.ఎం. రత్నం ఈ చిత్రం థియేటర్లలో చూసినప్పుడే పూర్తి అనుభూతి కలిగిస్తుందని అన్నారు. నభా నటేశ్ ఈ చిత్రాన్ని చరిత్ర, రహస్యాలు, యాక్షన్, భావోద్వేగాల సమ్మేళనంగా అభివర్ణించగా, హీరో విరాట్ కర్ణ ఈ సినిమా తనలో ఆధ్యాత్మిక మార్పు తీసుకువచ్చిందని తెలిపారు.

ఇదిలా ఉండగా, వెట్రి ప్రధాన పాత్రలో దయాళన్ పద్మనాభన్ దర్శకత్వంలో రూపొందిన ‘లక్ష్మీకాంతన్ కొలైవళక్కు’ ట్రైలర్ విడుదలైంది. 1944లో సంచలనం సృష్టించిన పాత్రికేయుడు సి.ఎన్. లక్ష్మీకాంతన్ హత్య కేసు ఆధారంగా ఈ చిత్రాన్ని తెరకెక్కించారు. మరోవైపు, కార్తి హీరోగా పి.ఎస్. మిత్రన్ దర్శకత్వంలో రూపొందుతున్న ‘సర్దార్ 2’ చిత్రాన్ని సెప్టెంబర్ 10న విడుదల చేయనున్నట్లు చిత్రబృందం అధికారికంగా ప్రకటించింది. ఈ చిత్రంలో ఎస్.జే. సూర్య, మాళవికా మోహనన్, ఆషికా రంగనాథన్ తదితరులు కీలక పాత్రల్లో నటిస్తున్నారు.