‘ది ప్యారడైజ్’ ఈవెంట్‌లో రాఘవ్ జుయల్ హంగామా.. స్లో మోషన్ డ్యాన్స్‌తో అదుర్స్!

నాని హీరోగా శ్రీకాంత్ ఓదెల దర్శకత్వంలో తెరకెక్కుతున్న ‘ది ప్యారడైజ్’ ప్రీ రిలీజ్ ఈవెంట్ హైదరాబాద్‌లో గ్రాండ్‌గా జరిగింది. ఈ కార్యక్రమంలో సినిమాలో కీలక పాత్రతో పాటు విలన్‌గా కనిపించనున్న రాఘవ్ జుయల్ ప్రత్యేక ఆకర్షణగా నిలిచారు. తనదైన స్లో మోషన్ డ్యాన్స్ స్టైల్‌తో స్టేజ్‌పై సందడి చేసిన ఆయన.. పలు పాటలకు ప్రత్యేకమైన స్టెప్పులతో ప్రేక్షకులను అలరించారు. అనంతరం యాంకర్ సుమతో కలిసి కూడా డ్యాన్స్ చేయడంతో ఈ పెర్ఫార్మెన్స్‌కు సంబంధించిన వీడియోలు సోషల్ మీడియాలో వైరల్‌గా మారాయి.

2009లో ‘డ్యాన్స్ ఇండియా డ్యాన్స్’ మొదటి సీజన్ ద్వారా గుర్తింపు తెచ్చుకున్న రాఘవ్ జుయల్.. తన ప్రత్యేకమైన డ్యాన్స్ శైలితో ప్రేక్షకుల్లో ప్రత్యేక స్థానం సంపాదించుకున్నారు. ఆ తర్వాత నటుడిగా, యాంకర్‌గా, టెలివిజన్ ప్రజెంటర్‌గా కూడా తన ప్రతిభను చాటారు. ‘సోనాలి కేబుల్’, ‘అభయ్’, ‘కిల్’, ‘యుధ్ర’ వంటి ప్రాజెక్టుల్లో నటించిన ఆయన ఇప్పుడు ‘ది ప్యారడైజ్’తో తెలుగు ప్రేక్షకులకు పరిచయం కానున్నారు. నానితో పాటు మోహన్ బాబు, కయాదు లోహర్, సోనాలి కులకర్ణి నటిస్తున్న ఈ చిత్రానికి అనిరుధ్ రవిచందర్ సంగీతం అందిస్తున్నారు. ఎస్‌ఎల్‌వీ సినిమాస్ బ్యానర్‌పై సుధాకర్ చెరుకూరి నిర్మిస్తున్న ఈ సినిమా సెప్టెంబర్ 24న ప్రపంచవ్యాప్తంగా థియేటర్లలో విడుదల కానుంది.