క్షమాపణకు నో.. అమిత్ షాపై రాహుల్ గాంధీ ఫైర్

లోక్‌సభ ప్రతిపక్ష నాయకుడు రాహుల్ గాంధీ, విద్యార్థులపై జరిగిన చర్యల విషయంలో కేంద్ర హోంమంత్రి అమిత్ షాపై చేసిన వ్యాఖ్యలకు పూర్తిగా కట్టుబడి ఉన్నానని స్పష్టం చేశారు. ఈ విషయంలో తాను ఎలాంటి క్షమాపణ చెప్పబోనని మీడియా ముందుకు వచ్చి వెల్లడించారు. దేశంలోని పోలీసులు, పారామిలటరీ దళాలు అన్నీ కేంద్ర హోం శాఖ పరిధిలోనే ఉండటంతో, విద్యార్థులపై జరిగిన దాడికి హోంమంత్రే బాధ్యత వహించాలని ఆయన ఆరోపించారు.

అమిత్ షా ఆదేశాలు ఇవ్వలేదంటే తన శాఖలో జరుగుతున్న విషయాలపై ఆయనకు అవగాహన లేకపోవడం స్పష్టమవుతుందని రాహుల్ విమర్శించారు. ఈ ఘటనలో తాను క్షమాపణ చెప్పాల్సిన అవసరం లేదని, బదులుగా విద్యార్థులకు అమిత్ షానే బహిరంగంగా క్షమాపణ చెప్పాలని డిమాండ్ చేశారు. విద్యార్థులు తమ హక్కుల కోసం శాంతియుతంగా పోరాడుతున్నారని, వారిపై బలప్రయోగం చేయడం తప్పని ఆయన పేర్కొన్నారు. ప్రభుత్వం ఒత్తిడికి తాము లొంగబోమని, యువత హక్కుల కోసం పోరాటం కొనసాగుతుందని తెలిపారు.