మొత్తం లోక్‌సభ స్థానాలు గెలిచినా ఈవీఎంలను వ్యతిరేకిస్తాం: అఖిలేశ్ యాదవ్

సమాజ్‌వాదీ పార్టీ అధినేత అఖిలేశ్ యాదవ్ మరోసారి ఎలక్ట్రానిక్ ఓటింగ్ మెషీన్ల (EVMs) వినియోగంపై తన వ్యతిరేకతను వ్యక్తం చేశారు. ఉత్తరప్రదేశ్‌లోని మొత్తం లోక్‌సభ స్థానాల్లో తమ పార్టీ విజయం సాధించినా ఈవీఎంలకు వ్యతిరేకంగా పోరాటం కొనసాగిస్తామని స్పష్టం చేశారు. వారణాసి పర్యటనలో మీడియాతో మాట్లాడిన ఆయన.. ఎన్నికల్లో ఎన్ని స్థానాలు గెలిచామనే అంశంతో ఈవీఎంలపై తమ వైఖరికి సంబంధం లేదని పేర్కొన్నారు.

ఎన్నికల ప్రక్రియ నుంచి ఈవీఎంలను తొలగించాలన్నదే తమ పార్టీ అభిప్రాయమని అఖిలేశ్ తెలిపారు. ఎన్నికల ఫలితాలతో సంబంధం లేకుండా ఈ అంశంపై తమ పోరాటం కొనసాగుతుందని చెప్పారు. ప్రతిపక్ష పార్టీలకు చెందిన పలువురు నేతలు కూడా ఈవీఎంల వినియోగంపై అభ్యంతరాలు వ్యక్తం చేస్తూ, ఎన్నికల విధానంలో మార్పులు కోరుతున్న నేపథ్యంలో అఖిలేశ్ వ్యాఖ్యలు మరోసారి రాజకీయంగా చర్చనీయాంశమయ్యాయి.