బిగ్‌బాస్ తెలుగు 10 ప్రోమో 1: హౌస్‌మేట్స్‌కు నాగార్జున స్ట్రాంగ్‌ వార్నింగ్‌

వారం మొత్తం జరిగే ఆటతో పోలిస్తే వారాంతపు బిగ్‌బాస్‌ ఎపిసోడ్‌ మరింత ఆసక్తికరంగా సాగుతుంది. ముఖ్యంగా శనివారం ఎపిసోడ్‌లో నాగార్జున వచ్చి కంటెస్టెంట్ల ఆటతీరుపై స్పందిస్తుండటంతో ప్రేక్షకులు ఆసక్తిగా ఎదురుచూస్తుంటారు. తాజాగా బిగ్‌బాస్‌ తెలుగు పదో సీజన్‌ వీకెండ్‌ ఎపిసోడ్‌కు సంబంధించిన తొలి ప్రోమో విడుదలైంది. స్టైలిష్‌ లుక్‌లో కనిపించిన నాగార్జున ఈసారి సీరియస్‌గా కనిపించారు. అగ్నిపరీక్ష తర్వాతే అసలు మహా పరీక్ష మొదలవుతుందని చెబుతూ గేమ్‌ ప్రక్రియను వివరించారు. మొత్తం 16 మంది కంటెస్టెంట్లు హౌస్‌లోకి వెళ్లగా, ముగ్గురు మాత్రమే హౌస్‌మేట్స్‌గా మారారని, ఈ వారంలో ఇద్దరు ఎలిమినేట్‌ అయ్యారని తెలిపారు. ఇంకా 11 మంది కంటెస్టెంట్లు రిస్క్‌లో ఉన్నారని వెల్లడించారు.

ఎలిమినేట్‌ అయిన ఇద్దరు కంటెస్టెంట్లు సీక్రెట్‌ రూమ్‌లో ఉన్నారనే అనుమానాలకు కూడా నాగార్జున క్లారిటీ ఇచ్చారు. ముందుగా చరణ్‌తో లైవ్‌లో మాట్లాడిన ఆయన, తాను సీక్రెట్‌ రూమ్‌లో ఉన్నానని హౌస్‌మేట్స్‌ అనుకుంటున్నారని చెప్పి ఎక్కడ ఉన్నాడో వెల్లడించాలని కోరారు. అందుకు చరణ్‌ తాను ఇంటికి వచ్చేశానని, తన ఇంట్లోనే ఉన్నానని స్పష్టం చేశాడు. అనంతరం చైత్రను కూడా లైవ్‌లోకి తీసుకురాగా, తాను సీక్రెట్‌ రూమ్‌లో లేనని ఆమె కూడా స్పష్టం చేసింది.

అనంతరం నాగార్జున మిగిలిన హౌస్‌మేట్స్‌ను హెచ్చరించారు. ఆటలో ఏమాత్రం అలసత్వం ప్రదర్శించినా హౌస్‌ నుంచి ఎలిమినేట్‌ కావాల్సి వస్తుందని స్ట్రాంగ్‌ వార్నింగ్‌ ఇచ్చారు. అయితే ప్రేక్షకులు ముఖ్యంగా త్రిగుణ్‌ విషయంలో నాగార్జున ఎలా స్పందిస్తారో చూడాలని ఆసక్తిగా ఎదురుచూశారు. కానీ తొలి ప్రోమోలో త్రిగుణ్‌ గురించి ఎలాంటి ప్రస్తావన కనిపించలేదు. త్రిగుణ్‌ మాత్రం అమాయకంగా కనిపిస్తూ ఉండటంతో, తదుపరి ప్రోమోలో అతడి ఆటతీరుపై నాగార్జున ఎలాంటి ప్రశ్నలు వేస్తారనే ఆసక్తి నెలకొంది.