నానో విటమిన్‌ డీ3 ఔషధానికి డీసీజీఐ అనుమతి

హైదరాబాద్‌ కేంద్రంగా పనిచేస్తున్న పల్స్‌ ఫార్మాస్యూటికల్స్‌ అభివృద్ధి చేసిన నానో-క్యారియర్‌ ఎన్‌ట్రాప్డ్‌ విటమిన్‌ డీ3 మౌఖిక ఔషధానికి భారత ఔషధ నియంత్రణ సంస్థ (డీసీజీఐ) అనుమతి లభించినట్లు కంపెనీ ప్రకటించింది. కఠినమైన శాస్త్రీయ, వైద్యపరమైన పరీక్షల అనంతరం ఈ అనుమతి లభించిందని కంపెనీ వ్యవస్థాపకుడు, ఎండీ కేవీ రాంబాబు తెలిపారు. నానో సాంకేతికత ఆధారిత విటమిన్‌ డీ3 ఔషధానికి ఈ తరహా నియంత్రణ అనుమతి ప్రపంచంలోనే తొలిసారిగా లభించిందని ఆయన పేర్కొన్నారు.

వైద్యపరమైన పరీక్షల్లో ఈ ఔషధం వినియోగంతో రక్తంలోని విటమిన్‌ డీ3 స్థాయిలు 50–60 శాతం పెరిగినట్లు వెల్లడైందని రాంబాబు తెలిపారు. 2010 నుంచి ఈ ఔషధంపై పరిశోధనలు నిర్వహిస్తున్నామని, కంపెనీకి చెందిన ‘అక్వీల్‌’ సొంత సాంకేతిక వేదిక ద్వారా దీన్ని అభివృద్ధి చేసినట్లు చెప్పారు. ప్రస్తుతం ఇదే సాంకేతికతతో విటమిన్‌ కే2-7, విటమిన్‌ బీ12, ఇనుము ఉత్పత్తులపై కూడా పనిచేస్తున్నట్లు తెలిపారు. రూర్కీ, బద్దీ, హైదరాబాద్‌లో తయారీ కేంద్రాలను నిర్వహిస్తున్న కంపెనీ.. హైదరాబాద్‌ జినోమ్‌ వ్యాలీలో రూ.150 కోట్ల పెట్టుబడితో కొత్త తయారీ కేంద్రాన్ని ఏర్పాటు చేస్తోందని వెల్లడించారు.