నీట్ రచ్చ.. ఖాన్ సర్‌పై భారీ దావా!

ప్రముఖ జర్నలిస్ట్ అంజనా ఓం కశ్యప్ మరియు టీవీ టుడే నెట్‌వర్క్, ప్రముఖ విద్యావేత్త ఫైసల్ ఖాన్ అలియాస్ ఖాన్ సర్‌తో పాటు పలువురు వ్యక్తులు, సంస్థలపై ఢిల్లీ హైకోర్టులో ₹2 కోట్ల సివిల్ పరువు నష్టం దావా దాఖలు చేశారు. నీట్ పరీక్ష వ్యవస్థపై జరిగిన చర్చల అనంతరం సోషల్ మీడియా మరియు డిజిటల్ వేదికలలో ప్రచారంలోకి వచ్చిన వివాదాస్పద కంటెంట్ ఈ వ్యాజ్యానికి కారణమైనట్లు పేర్కొన్నారు.

పిటిషన్ ప్రకారం, మే 30 నుంచి జూన్ 4 మధ్య ప్రచారమైన వీడియోలు, పోస్టులు, వ్యాఖ్యలు అంజనా ఓం కశ్యప్ వృత్తిపరమైన ప్రతిష్ఠకు నష్టం కలిగించాయని ఆరోపించారు. వివాదాస్పద కంటెంట్‌ను తొలగించాలని, అలాగే ₹2 కోట్ల నష్టపరిహారం మంజూరు చేయాలని కోర్టును కోరారు. యూట్యూబ్, ఎక్స్, మెటా అనుబంధ సేవల నుంచి సంబంధిత కంటెంట్ తొలగించడంతో పాటు భవిష్యత్తులో ఇలాంటి ప్రచురణలను నిరోధించాలని కూడా పిటిషన్‌లో విజ్ఞప్తి చేశారు. ఈ కేసును ఢిల్లీ హైకోర్టు వెకేషన్ బెంచ్ విచారించనుండగా, ఆరోపణలపై తుది నిర్ణయం ఇంకా వెలువడలేదు.