బాలయ్య చిత్రంలో లేడీ విలన్?

నందమూరి బాలకృష్ణ, దర్శకుడు కొరటాల శివ కాంబినేషన్‌లో రూపొందనున్న భారీ యాక్షన్ చిత్రంపై సినీ వర్గాల్లో కొత్త చర్చ మొదలైంది. ఈ ప్రతిష్టాత్మక ప్రాజెక్ట్‌కు సంబంధించిన అధికారిక వివరాలు ఇంకా వెలువడకపోయినా, నటీనటుల ఎంపికపై పలు వార్తలు వినిపిస్తున్నాయి. వాటిలో ముఖ్యంగా తెలుగు నటి ఐశ్వర్య రాజేష్ పేరు ప్రముఖంగా వినిపిస్తోంది. ఆమె ఈ సినిమాలో కీలక పాత్ర పోషించనున్నట్లు ప్రచారం జరుగుతోంది. కథలో ఆమె పాత్రకు ప్రత్యేక ప్రాధాన్యం ఉండబోతుందని, సాధారణ పాత్ర కాకుండా కథను మలుపు తిప్పే విధంగా ఉంటుందనే సమాచారం ఇండస్ట్రీలో చక్కర్లు కొడుతోంది.

ప్రత్యేకంగా హీరోయిన్ పాత్రకు బదులుగా పూర్తి ప్రతినాయక ఛాయలు కలిగిన శక్తివంతమైన పాత్రలో ఐశ్వర్య రాజేష్ కనిపించనున్నారనే ప్రచారం అభిమానుల్లో ఆసక్తిని పెంచుతోంది. బాలకృష్ణకు ఎదురుగా ఆమె విలన్‌గా నిలిస్తే తెరపై కొత్త తరహా పోటీ చూడొచ్చనే అభిప్రాయాలు వ్యక్తమవుతున్నాయి. యువసుధా ఆర్ట్స్, ఎస్‌ఎల్‌వీ సినిమాస్ సంయుక్తంగా నిర్మిస్తున్న ఈ చిత్రంపై అధికారిక ప్రకటన కోసం అభిమానులు ఆసక్తిగా ఎదురుచూస్తున్నారు. పాత్రల ఎంపికపై వస్తున్న వార్తలతో సినిమాపై అంచనాలు మరింత పెరుగుతున్నాయి.