విజయ్‌-అజిత్‌ కలయికపై డీఎంకే విమర్శలు.. టీవీకే కౌంటర్

తమిళనాడు ముఖ్యమంత్రి విజయ్‌ యూకే పర్యటనపై డీఎంకే విమర్శలు చేసింది. తన స్నేహితుడు, నటుడు అజిత్‌కుమార్‌ పాల్గొన్న కారు రేసును చూసేందుకే విజయ్‌ లండన్ వెళ్లారని ఆరోపించింది. దీనిపై టీవీకే స్పందిస్తూ.. అధికారిక పర్యటనలో భాగంగా స్నేహితుడిని కలవడంలో తప్పేమీ లేదని స్పష్టం చేసింది. సిల్వర్‌స్టోన్‌లో జరిగిన మిషెలిన్‌ లే మాన్స్‌ కప్‌ రేసును విజయ్‌ సంప్రదాయ ఆకుపచ్చ జెండా ఊపి ప్రారంభించారు.

విజయ్‌ పర్యటన ప్రధాన ఉద్దేశం తమిళనాడుకు పెట్టుబడులను ఆకర్షించడం, మోటార్‌ స్పోర్ట్స్‌ మౌలిక వసతులు, క్రీడా పర్యాటకం, చెన్నై సమీపంలో ప్రతిపాదించిన మోటార్‌ స్పోర్ట్స్‌ సిటీకి సంబంధించిన అవకాశాలను పరిశీలించడమేనని టీవీకే తెలిపింది. ఇదే సమయంలో సిల్వర్‌స్టోన్‌లో విజయ్‌ అజిత్‌కుమార్‌ను ఆత్మీయంగా ఆలింగనం చేసుకున్న దృశ్యాలు ప్రత్యేక ఆకర్షణగా నిలిచాయి. ఈ వీడియోలు, ఫొటోలు అభిమానులను విశేషంగా ఆకట్టుకుంటున్నాయి.