బిగ్‌బాస్ షాలిని జీవితంలో ఎన్నో కష్టాలు.. సవతి తల్లి చేసిన త్యాగం ఇదే!

బిగ్‌బాస్ తెలుగు కంటెస్టెంట్ షాలిని దామెర పటేల్ తన జీవితంలో ఎదుర్కొన్న కష్టాలను, తనకు అండగా నిలిచిన కుటుంబ సభ్యుల గురించి వెల్లడించారు. తనకు ఎనిమిది నెలల వయసులోనే అనారోగ్య కారణాలతో తల్లి చనిపోయారని, దీంతో కన్నతల్లి ఎలా ఉంటుందో కూడా తనకు తెలియదని చెప్పారు. ఆ తర్వాత ఏడాదికే తండ్రి హైదరాబాద్‌కు వెళ్తుండగా భారీ రోడ్డు ప్రమాదానికి గురయ్యారని తెలిపారు. ఈ ప్రమాదంలో తండ్రికి తీవ్ర గాయాలు కావడంతో పాటు కన్ను దెబ్బతినడం, పలు ఎముకలు విరగడం వంటి సమస్యలు ఎదురయ్యాయని చెప్పారు.

తనను, తన అక్కను చూసుకోవడం నానమ్మకు కష్టంగా మారడంతో తండ్రి మరో వివాహం చేసుకున్నారని షాలిని తెలిపారు. అయితే సవతి తల్లి తమను సొంత పిల్లల్లాగే చూసుకున్నారని, తల్లి లేని లోటును భర్తీ చేశారని చెప్పారు. తండ్రి అనారోగ్యంతో మరణించిన తర్వాత కూడా సవతి తల్లి తమకు అండగా నిలిచారని, తమను సొంత పిల్లలుగా భావించి పిల్లలను కూడా కనకుండా తమ కోసం ఉండిపోయారని షాలిని పేర్కొన్నారు. చిన్నతనంలో ఒక దశలో జీవితంపై విరక్తి కలిగినా, కష్టాలను ఎదుర్కొంటూ ముందుకు సాగడం నేర్చుకున్నానని చెప్పారు. తనను సానుభూతితో కాకుండా తన వ్యక్తిత్వం, ప్రతిభతోనే ప్రజలు గుర్తించాలని కోరుకుంటున్నట్లు షాలిని తెలిపారు.