వరల్డ్ ఛాంపియన్‌షిప్‌లో పీవీ సింధు శుభారంభం..

భారత స్టార్ షట్లర్, మాజీ ప్రపంచ ఛాంపియన్ పీవీ సింధు 2026 బ్యాడ్మింటన్ వరల్డ్ ఛాంపియన్‌షిప్‌లో అదిరిపోయే ఆరంభం చేసింది. న్యూఢిల్లీలోని ఇందిరా గాంధీ ఇండోర్ స్టేడియంలో సోమవారం జరిగిన మహిళల సింగిల్స్ తొలి రౌండ్‌లో ఐర్లాండ్‌కు చెందిన సోఫియా నోబుల్‌పై 21-7, 21-11తో వరుస గేముల్లో విజయం సాధించింది. సొంతగడ్డపై అభిమానుల మద్దతుతో బరిలోకి దిగిన సింధు తొలి ర్యాలీ నుంచే ఆధిపత్యం ప్రదర్శించింది. ఆరంభంలోనే ఆధిక్యం సాధించి ప్రత్యర్థిపై ఒత్తిడి పెంచింది.

రెండో గేమ్‌లో నోబుల్ కాస్త మెరుగ్గా పోరాడే ప్రయత్నం చేసినప్పటికీ సింధు తన నియంత్రణను కోల్పోలేదు. ర్యాలీలను సమర్థంగా నియంత్రిస్తూ కీలక సమయాల్లో దూకుడైన షాట్లు ఆడి ప్రత్యర్థికి ఎలాంటి అవకాశం ఇవ్వలేదు. చివరకు 29 నిమిషాల్లో 21-7, 21-11తో మ్యాచ్‌ను ముగించి మహిళల సింగిల్స్ రౌండ్ ఆఫ్ 32లోకి దూసుకెళ్లింది. స్వదేశంలో జరుగుతున్న ప్రతిష్ఠాత్మక టోర్నీలో సింధుకు ఈ విజయం ఆత్మవిశ్వాసాన్ని పెంచింది.