చైనా స్పేస్‌లో బిగ్‌ సక్సెస్‌.. జూక్‌-3 రాకెట్‌ ఘనత!

అంతరిక్ష రంగంలో చైనా మరో కీలక విజయాన్ని నమోదు చేసింది. ‘జూక్‌-3’ రాకెట్‌ను బుధవారం డోంగ్‌ఫెంగ్‌ వాణిజ్య అంతరిక్ష ప్రయోగ కేంద్రం నుంచి విజయవంతంగా ప్రయోగించింది. రాకెట్‌ నిర్దేశిత కక్ష్యలోకి చేరిన అనంతరం తొలి దశ విడిపోయి, గాన్సు ప్రావిన్స్‌లోని మిన్‌చిన్‌ కౌంటీలో భూఉపరితలంపై సురక్షితంగా ల్యాండ్‌ అయింది. సుమారు 66.1 మీటర్ల పొడవున్న ఈ రాకెట్‌ తొలి దశలో తొమ్మిది ఇంజిన్లు ఉన్నాయి.

చైనా రాకెట్‌ తొలి దశను తిరిగి స్వాధీనం చేసుకోవడం ఇది రెండోసారి కాగా, భూమిపై విజయవంతంగా ల్యాండ్‌ చేయడం మాత్రం ఇదే తొలిసారి. గతంలో జులై 10న లాంగ్‌ మార్చ్‌-10బీ రాకెట్‌ తొలి దశ సముద్రంలో ల్యాండ్‌ అయింది. రాకెట్‌ తొలి దశలను తిరిగి ల్యాండ్‌ చేసి పునర్వినియోగించే సాంకేతికతలో అమెరికాకు చెందిన స్పేస్‌ఎక్స్‌, బ్లూ ఆరిజిన్‌ ఇప్పటికే ముందంజలో ఉన్నాయి. రాకెట్లను పునర్వినియోగించడం ద్వారా భవిష్యత్తులో అంతరిక్ష ప్రయోగాల వ్యయాన్ని గణనీయంగా తగ్గించే అవకాశం ఉంది.