పర్యాటక రంగానికి మౌలిక సదుపాయాలే పెద్ద సవాల్

ఆంధ్రప్రదేశ్‌లో పర్యాటకుల సంఖ్య క్రమంగా పెరుగుతున్నప్పటికీ, ప్రముఖ పర్యాటక ప్రాంతాల్లో కనీస సౌకర్యాల కొరత తీవ్రంగా కనిపిస్తోంది. తాగునీరు, మరుగుదొడ్లు, దుస్తులు మార్చుకునే గదులు, విశ్రాంతి షెల్టర్లు వంటి ప్రాథమిక సదుపాయాలు లేక పర్యాటకులు ఇబ్బందులు పడుతున్నారు. కేంద్ర ప్రభుత్వం స్వదేశ్ దర్శన్ పథకం కింద కేటాయించిన రూ.172.35 కోట్లతో గండికోట, అఖండ గోదావరి ప్రాజెక్టుల్లో చేపట్టిన అభివృద్ధి పనులు మినహా, రాష్ట్రంలోని అనేక సందర్శనీయ ప్రాంతాల్లో కొత్తగా పెద్దగా అభివృద్ధి జరగలేదు.

విజయవాడ భవానీద్వీపం, పాపికొండలు, దిండి రిసార్ట్స్‌, హార్సిలీ హిల్స్‌ వంటి ప్రధాన పర్యాటక ప్రాంతాల్లో నిర్వహణ లోపాలు స్పష్టంగా కనిపిస్తున్నాయి. రాష్ట్రంలోని 200 ప్రముఖ పర్యాటక ప్రాంతాల్లో కేవలం 25 ప్రాంతాల్లో మాత్రమే కనీస సౌకర్యాలు అందుబాటులో ఉన్నాయి. 266 బీచ్‌లలో దాదాపు 70 శాతం బీచ్‌లకు ప్రాథమిక వసతులు లేవు. పర్యాటకాభివృద్ధి సంస్థ ఆధ్వర్యంలోని హోటళ్లు, రిసార్ట్స్‌లోనూ నిర్వహణ, సేవల నాణ్యతపై విమర్శలు వ్యక్తమవుతున్నాయి. పర్యాటక రంగ అభివృద్ధికి మౌలిక సదుపాయాల కల్పన, ఆధునికీకరణ అత్యవసరంగా మారింది.