బిగ్‌బాస్‌లో వైల్డ్ కార్డ్ ఎంట్రీ? ఏకంగా 8 మంది రాబోతున్నారట!

బిగ్‌బాస్ తెలుగు 10 సీజన్ ఎంతో అట్టహాసంగా ప్రారంభమై తొలి వారంలోనే ఆసక్తికరంగా మారింది. మొత్తం 16 మంది కంటెస్టెంట్లలో 10 మంది సెలబ్రిటీలు, ఆరుగురు కామనర్స్‌గా హౌస్‌లోకి అడుగుపెట్టారు. ప్రస్తుతం బ్లూ టీమ్‌గా ఉన్న సెలబ్రిటీలు, రెడ్ టీమ్‌గా ఉన్న కామనర్స్ మధ్య మైండ్ గేమ్స్, ఫిజికల్ టాస్కులు, మాటల యుద్ధాలు హోరాహోరీగా సాగుతున్నాయి. ఆట ప్రారంభమై కొద్ది రోజులే అయినా కంటెస్టెంట్ల మధ్య విభేదాలు ఇప్పటికే హాట్ టాపిక్‌గా మారాయి.

ముఖ్యంగా హీరో అదిత్ అరుణ్ అలియాస్ త్రిగుణ్ తన దూకుడు, ముక్కుసూటి ప్రవర్తనతో అందరి దృష్టిని ఆకర్షిస్తున్నారు. మరో కంటెస్టెంట్ రోహిత్‌తో ఆయనకు విభేదాలు ఎక్కువగా కనిపిస్తున్నాయి. ఇదిలా ఉంటే వైల్డ్ కార్డ్ ఎంట్రీలపై ఇప్పుడు ఆసక్తికరమైన ప్రచారం జరుగుతోంది. ఇండస్ట్రీ వర్గాల్లో వినిపిస్తున్న సమాచారం ప్రకారం ఏకంగా ఎనిమిది మంది కొత్త కంటెస్టెంట్లను హౌస్‌లోకి పంపేందుకు బిగ్‌బాస్ టీమ్ ప్రయత్నిస్తున్నట్లు తెలుస్తోంది. ‘బిగ్ అగ్ని పరీక్ష 2’లో పాల్గొన్న రామకృష్ణ, మితిలేష్‌తో పాటు దీపక్, అపూర్వ పేర్లు కూడా వినిపిస్తున్నాయి. వీరిలో రామకృష్ణ ఎంట్రీ దాదాపు ఖాయమని, మితిలేష్ కూడా రేసులో ఉన్నట్లు సమాచారం.

మరోవైపు లేడీ కంటెస్టెంట్ల విషయంలో సీరత్ కపూర్, ‘మ్యాడ్ ఫర్ ఈచ్ అదర్’ ఫేమ్ సోనియా, ఆషిక, సీరియల్ నటి సౌందర్య రెడ్డి పేర్లు పరిశీలనలో ఉన్నట్లు తెలుస్తోంది. ఎంటర్‌టైన్‌మెంట్ డోస్‌ను మరింత పెంచేందుకు జబర్దస్త్ కమెడియన్లు నూకరాజు, రాకింగ్ రాకేష్‌లను కూడా సంప్రదించినట్లు ప్రచారం జరుగుతోంది. అయితే ఈ వైల్డ్ కార్డ్ పేర్లపై మేకర్స్ నుంచి అధికారిక ప్రకటన రావాల్సి ఉంది. ఒకవేళ ఎనిమిది మంది ఒకేసారి హౌస్‌లోకి వస్తే, పాత కంటెస్టెంట్లు, కొత్తవారి మధ్య పోటీ మరింత పెరిగి షో గేమ్ పూర్తిగా మారే అవకాశం ఉంది.