లైంగిక వేధింపుల ఆరోపణలు.. హాకీ అధికారి గురిందర్‌ సింగ్‌ సంఘా వెనక్కి

ఆసియా క్రీడల్లో హాకీ పోటీలకు అంపైర్ మేనేజర్‌గా వ్యవహరిస్తున్న భారత హాకీ అధికారి గురిందర్ సింగ్ సంఘాను పలు లైంగిక వేధింపుల ఆరోపణల నేపథ్యంలో జపాన్‌ నుంచి స్వదేశానికి పంపినట్లు నివేదికలు వెల్లడించాయి. మలేషియాకు చెందిన ఓ మహిళా హాకీ అధికారితో పాటు నాగోయాలోని ఓ హోటల్ సిబ్బంది నుంచి ఆయనపై ఫిర్యాదులు వచ్చినట్లు PTI, ఇతర మీడియా సంస్థలు పేర్కొన్నాయి. అయితే ఈ ఆరోపణలపై సంఘా నుంచి ఇప్పటివరకు స్పందన వెలువడలేదు.

గురిందర్ సింగ్ సంఘాపై 2025లో జరిగిన హాకీ ఇండియా లీగ్‌ సందర్భంగా కూడా ఓ మహిళా అంపైర్ ఫిర్యాదు చేసినట్లు సమాచారం. దీనిపై హాకీ ఇండియా మూడు సభ్యుల కమిటీని ఏర్పాటు చేసి విచారణ జరిపిందని, అయితే తమకు అందిన సమాచారం ప్రకారం ఆ కమిటీ ఎలాంటి గణనీయమైన ఆధారాలను గుర్తించలేదని హాకీ ఇండియా వర్గాలు తెలిపాయి. ఆసియా క్రీడల హాకీ పోటీలకు అంపైర్లు, సాంకేతిక అధికారులు ఆసియా హాకీ సమాఖ్య నియమిస్తుంది. తాజా ఆరోపణలపై సమాఖ్య నివేదిక అందిన తర్వాత తదుపరి చర్యలు తీసుకుంటామని హాకీ ఇండియా తెలిపింది.