ఆఫీస్ 2021కు మైక్రోసాఫ్ట్ గుడ్‌బై..

మైక్రోసాఫ్ట్ తన ఆఫీస్ 2021 సాఫ్ట్‌వేర్‌కు అధికారిక మద్దతు అక్టోబర్ 13, 2026తో ముగుస్తుందని ప్రకటించింది. ఆ తేదీ తర్వాత భద్రతా అప్‌డేట్లు, బగ్ ఫిక్స్‌లు, సాంకేతిక సహాయం, సాఫ్ట్‌వేర్ మెరుగుదలలు అందుబాటులో ఉండవని కంపెనీ స్పష్టం చేసింది. ఆఫీస్ 2021 అప్లికేషన్లు పనిచేస్తూనే ఉన్నప్పటికీ, భద్రతా లోపాలు ఎదురయ్యే ప్రమాదం ఉంటుందని హెచ్చరించింది.

ఆఫీస్ 2021 కోసం ఎక్స్‌టెండెడ్ సెక్యూరిటీ అప్‌డేట్స్ (ESU) ప్రోగ్రామ్ ఉండదని మైక్రోసాఫ్ట్ వెల్లడించింది. వైరస్‌లు, స్పైవేర్, ఇతర సైబర్ ముప్పుల నుంచి రక్షణ కల్పించే అప్‌డేట్లు కూడా నిలిచిపోతాయి. దీంతో వినియోగదారులు మైక్రోసాఫ్ట్ 365 లేదా తాజా ఆఫీస్ వెర్షన్లకు మారాలని సూచించింది. విద్యాసంస్థలు, వ్యాపార సంస్థలు, కార్పొరేట్ వినియోగదారులు ముందుగానే అప్‌గ్రేడ్ ప్రణాళికలు సిద్ధం చేసుకోవాలని కంపెనీ సూచించింది.