చైనాను వణికిస్తున్న డాల్ఫిన్‌ తుపాను..

డాల్ఫిన్‌ తుపాను తూర్పు చైనాను తీవ్రంగా ప్రభావితం చేస్తోంది. భారీ వర్షాలు, బలమైన ఈదురు గాలులతో పలు ప్రాంతాల్లో వరదలు సంభవించడంతో పాటు కొండచరియలు విరిగిపడే ప్రమాదం నెలకొంది. దీంతో ముందస్తు జాగ్రత్తగా 10 లక్షల మందికి పైగా ప్రజలను సురక్షిత ప్రాంతాలకు తరలించారు. ముఖ్యంగా జెజియాంగ్‌ ప్రావిన్స్‌, షాంఘై ప్రాంతాల్లో అధికారులు సహాయక చర్యలను ముమ్మరం చేశారు. జెజియాంగ్‌లో తీరాన్ని తాకే సమయంలో తుపాను గరిష్ఠంగా గంటకు 151 కిలోమీటర్ల వేగంతో గాలులు వీచినట్లు అధికారులు తెలిపారు.

షాంఘైలో వర్ష బీభత్సం తీవ్రంగా ఉంది. కొన్ని ప్రాంతాల్లో 24 గంటల్లో సుమారు 313 మిల్లీమీటర్ల వర్షపాతం నమోదైంది. భారీ వర్షాల కారణంగా నగర జీవనం, రవాణా వ్యవస్థలు స్తంభించాయి. షాంఘై విమానాశ్రయాల్లో 1,300కు పైగా విమానాలను రద్దు చేశారు. పలు రహదారులు జలమయం కాగా, రైలు, ఇతర ప్రజా రవాణా సేవలకు కూడా అంతరాయం ఏర్పడింది. తుపాను ప్రభావంతో మరికొన్ని ప్రాంతాల్లోనూ భారీ వర్షాలు కొనసాగే అవకాశం ఉండటంతో అధికారులు ప్రజలను అప్రమత్తంగా ఉండాలని సూచిస్తున్నారు.