కేంద్ర పర్యావరణ మంత్రి భూపేందర్ యాదవ్ కార్యదర్శులపై కేంద్రం చర్య

కేంద్ర పర్యావరణశాఖ మంత్రి భూపేందర్ యాదవ్‌కు సంబంధించిన నలుగురు ప్రైవేటు కార్యదర్శులను తొలగిస్తూ కేంద్ర ప్రభుత్వం అసాధారణ నిర్ణయం తీసుకుంది. ఈ నెల 3వ తేదీన నాలుగు వేర్వేరు ఉత్తర్వులు జారీ చేసినప్పటికీ అవి మంగళవారం వెలుగులోకి వచ్చాయి. అయితే ఈ నిర్ణయానికి కారణాలు వెల్లడించలేదు. తొలగింపులో ప్రైవేటు కార్యదర్శి, సహాయ ప్రైవేటు కార్యదర్శి, ఇద్దరు అదనపు ప్రైవేటు కార్యదర్శులు ఉన్నారు.

2010 బ్యాచ్‌కు చెందిన ఐఆర్‌ఎస్ అధికారి అమర్ సింగ్‌ను 2024 జూన్‌లో ప్రైవేటు కార్యదర్శిగా నియమించగా, ఆయన పదవీకాలం సెప్టెంబర్ 7 వరకు ఉండాల్సి ఉంది. కానీ ముందుగానే ఆయనను రిలీవ్ చేసి స్వశాఖకు పంపించారు. సహాయ ప్రైవేటు కార్యదర్శి సిద్ధార్థ్ యాదవ్ నియామకాన్ని రద్దు చేసి, అదనపు ప్రైవేటు కార్యదర్శులు ఆయుష్ శరణ్, శైలేశ్ కుమార్ సింగ్‌లను కూడా తొలగించారు.