జెమినీ కోసం ప్రత్యేక ఏఐ చిప్..

గూగుల్ 'ఫ్రోజెన్ v2' అనే కోడ్‌నేమ్‌తో కొత్త తరం ఏఐ సర్వర్ చిప్‌ను అభివృద్ధి చేస్తున్నట్లు సమాచారం. ఈ చిప్‌లో జెమినీ ఏఐ మోడల్‌లోని కొన్ని సామర్థ్యాలను నేరుగా హార్డ్‌వేర్‌లో పొందుపరిచి ఏఐ ఇన్‌ఫరెన్స్ పనితీరును మరింత వేగవంతం చేయాలని సంస్థ లక్ష్యంగా పెట్టుకున్నట్లు నివేదికలు పేర్కొన్నాయి. ప్రస్తుతం డిజైన్‌ను తుది దశలో రూపొందిస్తున్న ఇంజినీర్లు, ఈ చిప్‌ను 2028 నాటికి అందుబాటులోకి తీసుకురావాలని భావిస్తున్నారు. నిర్దిష్ట ఏఐ పనుల్లో ఇది ప్రస్తుత గూగుల్ కస్టమ్ చిప్‌లతో పోలిస్తే 6 నుంచి 10 రెట్లు అధిక శక్తి సామర్థ్యాన్ని అందించగలదని సమాచారం.

ఈ ఫ్రోజెన్ v2 చిప్ గూగుల్ ప్రస్తుతం ఉపయోగిస్తున్న టెన్సర్ ప్రాసెసింగ్ యూనిట్స్ (TPUs)కు ప్రత్యామ్నాయం కాకుండా, వాటికి అనుబంధంగా పనిచేసే ప్రత్యేక ఏఐ చిప్ కుటుంబంగా అభివృద్ధి చేయబడుతోంది. హార్డ్‌వేర్, సాఫ్ట్‌వేర్‌ను సమన్వయంతో రూపొందించడం ద్వారా అత్యుత్తమ పనితీరు, సామర్థ్యాన్ని అందించడంపై గూగుల్ దృష్టి సారించిందని సంస్థ ప్రతినిధి తెలిపారు. ప్రపంచవ్యాప్తంగా ఏఐ మౌలిక సదుపాయాలపై భారీ పెట్టుబడులు పెరుగుతున్న సమయంలో గూగుల్ ఈ అడుగు వేయడం టెక్నాలజీ రంగంలో ప్రాధాన్యత సంతరించుకుంది.